தீராத கஷ்டங்களுக்குத் தீர்வாகும் யதிதுவாதசி, கஜச்சாயை.! மகாளயபட்சத்தில் இந்த நாள்களைத் தவறவிடாதீங்க!

மகாளய பட்சம் என்பது புரட்டாசி மாத அமாவாசைக்கு முன்பு வரும் 15 நாள்கள். இந்த நாள்கள் மிகவும் புனிதமானவையாகக் கருதப்படுகின்றன. குறிப்பாக முன்னோர்களை வழிபட மிகவும் உகந்தவை. இந்தக்காலகட்டத்தில் நம் முன்னோர்கள் பித்ரு லோகத்தில் இருந்து பூலோகம் வந்து இந்த 15 நாள்களும் நம்மோடு தங்கி இருப்பதாக ஐதிகம்.

எனவே இந்த நாள்களில் அவர்களை நினைப்பதும் அவர்களுக்கு தர்ப்பணம் கொடுப்பதும் அவர்களுக்குப் பெரும் திருப்தியைக் கொடுப்பதோடு அநேக ஆசீர்வாதங்களையும் நமக்குப் பெற்றுத்தரும். அப்படிப்பட்ட மகாளயபட்சத்தில் பல முக்கிய தினங்கள் உண்டு. அவற்றில் யதி துவாதசி, கஜச்சாயை போன்றவை சிறப்புவாய்ந்தவை.

தீராத பிரச்னைகளுக் காரணம் இதுவாக இருக்கலாம்

அந்தக் காலத்தில் குடும்பத்தில் யாரேனும் ஒருவர் சந்நியாசிவிடுவார்கள். அப்படி சந்நியாசி ஆனவர்களுக்கும் குடும்பத்துக்குமான தொடர்பு விட்டுப்போய்விடும். மூன்று நான்கு தலைமுறைகளுக்குப் பின் அவர்கள் குறித்த எந்தத் தகவலும் குடும்பத்தில் இருக்காது. அப்படி சந்நியாசியாகி இறந்துபோனவர்களுக்குத் தனியாக எந்த கர்மாவும் செய்யவேண்டியதில்லை. அதேவேளையில் அவர்களுக்கும் தர்ப்பணம் கொடுக்க முடியும். அப்படி சந்நியாசம் அடைந்தவர்களுக்குத் தர்ப்பணம் கொடுக்கும் நாள்தான் யதி துவாதசி. யதி என்றால் துறவி. துறவிகளுக்கான துவாதசி என்று பொருள். இந்த நாளில் நம் குடும்பத்தில் தோன்றி இறந்தவர்களின் பெயர்கள் தெரியாவிட்டாலும் அவர்களை மனதில் நினைத்துக்கொண்டு அவர்களுக்கு எள்ளும் தண்ணீரும் விட சகலவிதமான நன்மைகளும் வந்து சேரும். இந்த நாளில் சந்நியாசிகளுக்கும் சந்நியாசிகள் வாழும் மடங்களுக்கும் தானங்கள் கொடுப்பது மிகுந்த ஆசீர்வாதத்தைக் கொண்டுவரும்.

கஜச்சாயை

‘கஜம்’ என்றால் யானை; ‘சாயை’ என்றால் நிழல். யானையின் நிழலைப் போன்ற ஒரு குறிப்பிட்ட நிழல் விழும் காலத்தைக் குறிக்கும் பெயராக கஜச்சாயை சொல்லப்படுகிறது. சூரியனின் நிலையும், காலத்தின் கணக்கீடும் இணையும் ஒரு குறிப்பிட்ட தருணத்தைப் பண்டையோர் இவ்வாறு அழைத்தனர்.

மகாளய பட்ச காலத்தில் வரும் திரயோதசி திதியே கஜச்சாயை எனப்படுகிறது. இந்த நாளில் முன்னோர் வழிபாடு செய்வது மிகவும் சிறப்புடையதாகக் கருதப்படுகிறது. அதிலும் குடும்பத்தில் துர்மரணம் அடைந்தவர்களுக்குத் தர்ப்பணம் கொடுக்க வேண்டிய நாள். தீவிபத்து, கொலை, சாலை விபத்துகள் போன்றவற்றால் மரணம் அடைந்தவர்களின் ஆன்மா இந்த நாளில் தர்ப்பணம் கொடுத்தால் திருப்தி அடையும் என்கிறார்கள்.

பொதுவாக துர்மரணம் அடைந்தவர்களின் ஆன்மா சீக்கிரம் சாந்தி அடையாது என்பது நம்பிக்கை. நம் குடும்பத்தில் நிம்மதி அற்ற தன்மை நிலவுவதற்கு அதுவும் ஒரு காரணம் என்பார்கள். பல நேரங்களில் புண்ணியத்தலங்களுக்குச் சென்று வழிபாடு செய்தாலும் இந்த தோஷம் தீராது. அப்படிப் பட்டவர்கள் கஜச்சாயை நாளில் வழிபாடு செய்வது அவசியம். இந்த நாளில் குடும்பத்தில் மூன்று தலைமுறைகளுக்குள்ளாக துர்மரணம் அடைந்தவர்களின் பெயரைச் சொல்லி எள்ளும் தண்ணீரும் மூன்று முறை விட எளிதாக அவர்கள் திருப்தி அடைவார்கள். அப்படிப்பட்ட புண்ணிய தினம் இது என்கிறது ஞானநூல்.இந்த நாளில் உணவு தானம் செய்வது மிகவும் சிறப்பு. நீர், மோர் ஆகியன தானம் செய்ய நிச்சயம் முன்னோர்களின் ஆன்மா திருப்தி அடையும்.

இந்த ஆண்டு யதி துவாதசி நாளை (7.10.26) புதன்கிழமையும் கஜச்சாயை (8.10.26) அன்று வருகிறது. எனவே தீராத பிரச்னைகள் தீர உங்கள் முன்னோர்களை தவறாமல் நினைத்து வழிபடுங்கள். இந்த மகாளயபட்சத்தில் இதுவரை நீங்கள் முன்னோர்வழிபாடு செய்யவில்லை என்றாலும் அடுத்து வருகிற நான்கு நாள்களிலும் செய்யத் தவறாதீர்கள். அப்படிச் செய்வதன்மூலம் குடும்பத்தில் தீராத பிரச்னைகளும் தீரும் என்பது நம்பிக்கை.

மேலும் படிக்க »

இந்த செய்தியைப் பற்றிய கருத்தை பதிவு செய்யுங்கள். மேலும் இந்த செய்தியை உங்கள் நண்பர்களுடன் பகிர்ந்து கொள்ளுங்கள்.