Asian Games 2026: 48 ஆண்டுகால காத்திருப்புக்கு முற்றுப்புள்ளி வைத்த நீரு தண்டா - யார் இவர்?

ஆசிய விளையாட்டுப் போட்டிகளில் இந்தியாவின் துப்பாக்கிச் சுடுதல் வரலாற்றில் புதிய அத்தியாயத்தை எழுதியிருக்கிறார் நீரு தண்டா. ஹரியானா மாநிலம், ஜிந்த் மாவட்டத்தில் பிறந்த இவர், தனிநபர் டிராப் பிரிவில் தங்கப் பதக்கம் வென்றதன் மூலம், இந்தப் பிரிவில் தங்கம் வென்ற முதல் இந்தியப் பெண் என்ற பெருமையை அவர் பெற்றுள்ளார்.

இது ஒரு தனிப்பட்ட வெற்றி மட்டுமல்ல. இந்தியா 48 ஆண்டுக்கால காத்திருப்பிற்கு நீரு தண்டா முற்றுப்புள்ளி வைத்திருக்கிறார். 26 வயதான நீரு, ஐச்சி நகோயாவில் நடைபெற்ற இறுதிப்போட்டியில் 30 இலக்குகளில் 28-ஐ துல்லியமாகத் தாக்கி தங்கப் பதக்கத்தை வென்றார். அதுமட்டுமின்றி, தனது அபாரமான செயல்பாட்டின் மூலம் புதிய ஆசிய சாதனையையும் படைத்தார்.

48 ஆண்டுகளுக்குப் பிறகு மீண்டும் தங்கம்!

ஆசிய விளையாட்டுப் போட்டிகளில் தனிநபர் டிராப் பிரிவில் இந்தியாவுக்காகக் கடைசியாக தங்கம் வென்றவர் ரந்தீர் சிங். 1978-ஆம் ஆண்டு பாங்காக்கில் நடைபெற்ற ஆசிய விளையாட்டுப் போட்டிகளில் அவர் இந்தச் சாதனையை நிகழ்த்தியிருந்தார்.

அதன்பிறகு, தனிநபர் டிராப் பிரிவில் இந்தியாவுக்கு தங்கப் பதக்கம் கிடைக்கவில்லை. 48 ஆண்டுகளாக நீடித்த அந்தக் காத்திருப்பை, ஜப்பானில் தனது துல்லியமான குறி மூலம் முடிவுக்குக் கொண்டு வந்துள்ளார் நீரு.

மேலும், மகளிர் தனிநபர் டிராப் பிரிவில் இந்தியாவுக்குக் கிடைத்த முதல் ஆசிய விளையாட்டுப் பதக்கமும் இதுவாகும்.

தகுதிச் சுற்றிலேயே வெளிப்பட்ட திறமை

இறுதிப்போட்டிக்கு முன்பே நீரு தனது திறமையை நிரூபித்திருந்தார். தகுதிச் சுற்றில் 125 இலக்குகளில் 118-ஐ துல்லியமாகத் தாக்கிய அவர், கத்தாரின் ரே பாசிலுடன் இணைந்து முதலிடத்தைப் பிடித்தார். இதனால் இறுதிப் போட்டியில் இந்தியாவின் எதிர்பார்ப்பு அவர் மீது அதிகரித்தது. அந்த எதிர்பார்ப்பை ஏமாற்றாமல், பதக்கப் போட்டியிலும் தனது சிறப்பான ஆட்டத்தைத் தொடர்ந்தார்.

சவாலான சூழலிலும் துல்லியமான குறி

இறுதிப் போட்டி நீருவுக்கு எளிதானதாக இருக்கவில்லை. மழை மற்றும் குறைந்த பார்வைத்திறன் போன்ற சவாலான சூழ்நிலைகளுக்கு மத்தியிலும், அவர் தனது கவனத்தைச் சிதறவிடாமல் இலக்குகளைத் தாக்கினார்.

30 இலக்குகளில் 28-ஐத் துல்லியமாகத் தாக்கியதன் மூலம் தங்கத்தை உறுதி செய்தார். இந்த வெற்றியுடன் ஆசிய சாதனையையும் தனது பெயரில் பதிவு செய்தார்.

ஒரே நாளில் இரண்டு பதக்கங்கள்!

நீருவின் சாதனை இதோடு முடிவடையவில்லை. அதே நாளில் மகளிர் டிராப் குழுப் போட்டியிலும் இந்தியாவுக்காக அவர் பதக்கம் வென்றிருந்தார். மனிஷா கீர் மற்றும் ஆஷிமா அஹ்லாவத் ஆகியோருடன் இணைந்து போட்டியிட்ட நீரு, குழுப் பிரிவில் இந்தியாவுக்கு வெள்ளிப் பதக்கத்தைப் பெற்றுத் தந்தார்.

இதனால் ஒரே நாளில் தங்கமும் வெள்ளியும் என இரண்டு பதக்கங்களை வென்ற வீராங்கனையாகவும் நீருவின் நாள் அமைந்தது. நீரு தண்டாவுக்கு 2026-ஆம் ஆண்டு ஏற்கெனவே முக்கியமான ஆண்டாக அமைந்திருந்தது. ஜூலை மாதம் இத்தாலியின் லொனாட்டோவில் நடைபெற்ற ISSF உலகக் கோப்பை போட்டியில் டிராப் பிரிவில் தனிநபர் தங்கம் வென்ற முதல் இந்தியப் பெண் என்ற சாதனையையும் அவர் படைத்திருந்தார். அந்த வெற்றிக்குப் பிறகு, தற்போது ஆசிய விளையாட்டுப் போட்டியிலும் வரலாற்றுப் பதக்கத்தை வென்றுள்ளார்.

ராணுவ சேவை:

ராணுவத்தில் பெண்கள் சேர்க்கப்பட்டதைத் தொடர்ந்து நீரு தண்டா இந்திய ராணுவத்தின் ராணுவ போலீஸ் பிரிவில் (Corps of Military Police) சேர்ந்தார். தற்போது இந்திய ராணுவத்தில் நாயப் சுபேதார் (Naib Subedar) ஆக இருக்கும் இவர், மத்திய பிரதேசத்தின் மோவ் நகரில் உள்ள புகழ்பெற்ற ஆர்மி மார்க்ஸ்மேன்ஷிப் யூனிட்டில் பயிற்சி பெற்று வருகிறார்

புதிய வரலாற்றின் தொடக்கம்!

ஒரு தங்கப் பதக்கம், ஒரு ஆசிய சாதனை, 48 ஆண்டுகால காத்திருப்புக்கு முற்றுப்புள்ளி என நீரு தண்டாவின் இந்த வெற்றி பல சாதனைகளை ஒரே நேரத்தில் தன்னுள் கொண்டுள்ளது. இந்திய துப்பாக்கிச் சுடுதல் வரலாற்றில் ஏற்கெனவே இடம்பெற்றிருந்த ரந்தீர் சிங்கின் 1978 சாதனைக்குப் பிறகு, பல ஆண்டுகள் கழித்து அதே டிராப் பிரிவில் இந்தியாவின் பெயரை மீண்டும் தங்கப் பதக்கத்துடன் உயர்த்தியிருக்கிறார் நீரு.

அதிலும் குறிப்பாக, மகளிர் பிரிவில் இதைச் செய்த முதல் இந்தியப் பெண் என்ற பெருமை அவரது சாதனையை மேலும் சிறப்பாக்குகிறது. ஜப்பானில் கிடைத்த இந்தத் தங்கம், நீரு தண்டாவுக்கு ஒரு பதக்கம் மட்டுமல்ல. 48 ஆண்டுகால காத்திருப்பை முடித்து, இந்திய மகளிர் துப்பாக்கிச் சுடுதலுக்கான புதிய வரலாற்றைத் தொடங்கிய தருணம்.

மேலும் படிக்க »

இந்த செய்தியைப் பற்றிய கருத்தை பதிவு செய்யுங்கள். மேலும் இந்த செய்தியை உங்கள் நண்பர்களுடன் பகிர்ந்து கொள்ளுங்கள்.