Asian Games Badmintonல் வெண்கலம் வென்ற மன்னார்குடி வீரர்; அடுத்த இலக்கு ஒலிம்பிக்- தந்தை நம்பிக்கை

ஜப்பானில் 20-வது ஆசிய விளையாட்டுப் போட்டிகள் நடைபெற்று வருகின்றன. இதில் இந்தியாவின் பல மாநிலங்களைச் சேர்ந்த ஏராளமான வீரர்கள், வீராங்கனைகள் பல்வேறு போட்டிகளில் கலந்து கொண்டு இந்தியா சார்பில் விளையாடி தங்கள் திறமைகளை வெளிப்படுத்தி வருகின்றனர்.

திருவாரூர் மாவட்டம், மன்னார்குடியைச் சேர்ந்தவர் ஹரிஹரன். பேட்மிண்டன் வீரரான இவர் ஆசிய விளையாட்டு போட்டியில் கலந்து கொண்டார்.

ஆண்கள் பிரிவில் நடந்த பேட்மிண்டன் போட்டியில் களமிறங்கிய ஹரிஹரன் சிறப்பாக விளையாடி வெண்கலப் பதக்கம் வென்றுள்ளார். திருவாரூர் மாவட்டத்திற்குப் பெருமை சேர்த்த ஹரிஹரனைப் பலரும் பாராட்டி வருகின்றனர். இதனால் ஹரிஹரன் மட்டுமின்றி அவரது பெற்றோர் அம்சகர்ணன்- சத்யாவும் பாராட்டு மழையில் நனைந்து வருகின்றனர்.

இது குறித்து அம்ச கர்ணன் பேசுகையில், "என் மகன் இந்திய நாட்டிற்காக விளையாடி, ஆசிய விளையாட்டுப் போட்டியில் வெண்கலப் பதக்கம் வென்றிருப்பது எங்களுக்கு மிகுந்த மகிழ்ச்சியையும் பெருமையையும் அளிக்கிறது.

எங்க மகன் ஹரிஹரனுக்கு தமிழக முதல்வர் மற்றும் அமைச்சர்கள் வாழ்த்து தெரிவித்திருப்பது கூடுதல் மகிழ்ச்சி அளிக்கிறது. இந்த நேரத்தில் முதல்வர் உள்ளிட்ட அனைவருக்கும் நன்றியைத் தெரிவித்து கொள்கிறேன். சின்ன வயதில் இருந்தே ஹரிஹரனுக்கு பேட்மிண்டன் விளையாட்டில் ஆர்வம்.

இதற்காகத் தொடர்ந்து கடினமான பயிற்சிகளை மேற்கொண்டு பல்வேறு போட்டிகளில் பங்கேற்று வந்தான். கடந்த 2017-ஆம் ஆண்டு ஒற்றையர், இரட்டையர் மற்றும் கலப்பு இரட்டையர் பிரிவுகளில் ஹரிஹரன் வெற்றி பெற்று தனது திறமையை வெளிப்படுத்தினார்.

மேலும், தேசிய அளவிலான இரட்டையர் பேட்மிண்டன் போட்டியில் தமிழ்நாடு சார்பில் ஹரிஹரன்–ரூபன் ஜோடி பங்கேற்று தங்கப் பதக்கம் வென்று சாதனை படைத்தனர். தொடர்ந்து சர்வதேச அளவில் பல்வேறு போட்டிகளில் பங்கேற்று வரும் ஹரிஹரன், இந்தியாவுக்காக மேலும் பல பதக்கங்களை வெல்ல வேண்டும்.

ஆசிய விளையாட்டுப் போட்டியில் பதக்கம் வென்றுள்ள என் மகன், வரவிருக்கும் ஒலிம்பிக் போட்டியில் இந்திய அணிக்காகப் பங்கேற்று பதக்கம் வென்று தமிழ்நாட்டிற்கும், இந்திய நாட்டிற்கும், பிறந்த ஊர் மன்னார்குடிக்கும் பெருமை சேர்க்க வேண்டும். இதுதான் எங்களின் எதிர்பார்ப்பு. இதுதான் அவனுடைய அடுத்த இலக்கு" என்றார்.

மன்னார்குடியில் இருந்து சென்று சர்வதேச விளையாட்டுப் போட்டியில் இந்தியாவுக்காக பதக்கம் வென்றுள்ள ஹரிஹரனுக்குப் பாராட்டுக்குள் குவிந்து வருவது குறிப்பிடத்தக்கது.

மேலும் படிக்க »

இந்த செய்தியைப் பற்றிய கருத்தை பதிவு செய்யுங்கள். மேலும் இந்த செய்தியை உங்கள் நண்பர்களுடன் பகிர்ந்து கொள்ளுங்கள்.