2, 3 நாள்களில் ரஷ்யாவிலிருந்து டீசல் ஏற்றுமதி; அமெரிக்காவுக்கு உரமும் அனுப்பத் தயார் - புதின்
நேற்று அமெரிக்காவின் சிறப்புத் தூதர் ஸ்டீவ் விட்கோஃப் ரஷ்யாவில் அந்த நாட்டு அதிபர் புதினைச் சந்தித்தார்.
இந்தச் சந்திப்பு குறித்து புதின் தெரிவித்துள்ளதாவது...
“உக்ரைன் நெருக்கடிக்குத் தீர்வு காண்பதில் நீங்கள் செலுத்தும் கவனத்திற்கும், அதிபர் ட்ரம்பின் கவனத்திற்கும் நன்றி.
குறிப்பாக மனிதநேய அடிப்படையில் அதிபர் ட்ரம்ப் இந்தப் பிரச்னைக்கு முக்கியத்துவம் அளிக்கிறார் என்பதை நான் அறிவேன்.
எங்களது சமீபத்திய தொலைபேசி உரையாடல் உட்படப் பல்வேறு பேச்சுவார்த்தைகளில், இரு தரப்பிலும் உள்ள ராணுவ வீரர்களின் உயிரிழப்புகளைக் கருத்தில் கொண்டு, இந்த மோதலை உடனடியாக முடிவுக்குக் கொண்டுவர வேண்டியதன் அவசியத்தை அவர் வலியுறுத்தினார்.
ஆனால், இது ராணுவ வீரர்களின் இழப்புகள் பற்றியது மட்டுமல்ல. பொதுமக்கள் படும் துயரங்களைப் பற்றியதும் கூட.
ஈரான் போரில்...
ஈரானுடனான எங்களுடைய தனித்துவமான நம்பிக்கைக்குரிய உறவு உங்களுக்குத் தெரியும்.
ஈரானுடனான நெருக்கடியைத் தீர்க்க எங்களால் ஏதாவது செய்ய முடியும் என்றால், அதை நாங்கள் மகிழ்ச்சியுடன் செய்வோம்.
அமெரிக்கா - ரஷ்யா டீசல் ஒப்பந்தம்
அமெரிக்காவிற்கு ரஷ்யாவிலிருந்து டீசல் விநியோகிக்கப்படும் என்று இரு தரப்பும் அறிவித்த உடனேயே, சர்வதேசச் சந்தையில் டீசல் விலை உடனடியாக 5 முதல் 6 சதவிகிதம் வரை சரிந்தது.
40,000 டன்கள் கொள்ளளவு கொண்ட முதல் கப்பல் இன்னும் இரண்டு, மூன்று நாட்களில் ரஷ்யாவிலிருந்து அமெரிக்காவிற்குப் புறப்படும்.
அதைத் தொடர்ந்து மற்ற கப்பல்களும் ஒன்றன்பின் ஒன்றாகப் புறப்படும். அனைத்தும் முறையாக நடப்பதை உறுதி செய்ய நிதி ஏற்பாடுகள் சரியாக இருப்பதை உறுதி செய்வதே இங்கு முக்கியமானது.
உரம்...
அதிபர் ட்ரம்ப் தொலைபேசி உரையாடலின்போது, விவசாயிகளைப் பற்றிப் பேசினார். எங்களால் அமெரிக்கச் சந்தைக்குக் கணிசமான அளவில் உரங்களையும் விநியோகிக்க முடியும்”
இப்போது புதின் சொல்லியிருப்பதைப் பார்த்தால், ரஷ்யாவுடன் அமெரிக்கா டீசல் ஒப்பந்தத்துடன், உர ஒப்பந்தத்தையும் விரைவில் போடுமோ?
மேலும் படிக்க »
இந்த செய்தியைப் பற்றிய கருத்தை பதிவு செய்யுங்கள். மேலும் இந்த செய்தியை உங்கள் நண்பர்களுடன் பகிர்ந்து கொள்ளுங்கள்.
