Doctor Vikatan: கோதுமைப்புல் சாறு குடித்தால் கேன்சர் வராது என்பது உண்மையா?

Doctor Vikatan: தினமும் கோதுமைப்புல் ஜூஸ் குடித்தால் கேன்சர் வராது என்று சொல்கிறார்களே, அது உண்மையா? எவ்வளவு குடிக்க வேண்டும்..?

பதில் சொல்கிறார் திருப்பத்தூரைச் சேர்ந்த அரசு சித்த மருத்துவர் விக்ரம்குமார்

கோதுமைப்புல்லில் ஏராளமான நுண் வேதிப்பொருள்களும், ஆன்டி ஆக்ஸிடன்ட்ஸ்  (Antioxidants)   எனப்படும் ஆக்சிஜனேற்றத் தடுப்புகளும் மற்றும் அதிக அளவிலான நார்ச்சத்துகளும் நிறைந்துள்ளன.

இது உடலில் கழிவுகள் தேங்குவதைத் தடுக்க உதவுகிறது. அதன் மூலம்  உடல் ஆரோக்கியம் மேம்படுகிறது.

கோதுமைப்புல்லில் உள்ள ஆக்சிஜனேற்றத் தடுப்புத் தன்மையால் (Antioxidant properties), இது புற்றுநோய்க்கு எதிரான ஒரு பொருளாகக் கருதப்படுகிறது. அந்த வகையில் புற்றுநோய் வராமல் தடுக்கும் ஓர் உணவுப்பொருளாக இதைப் பார்க்கலாம். அதற்காக இதை மட்டுமே தொடர்ந்து சாப்பிட்டுக் கொண்டிருந்தால் புற்றுநோயே வராது என்று கூறிவிட முடியாது. மாறாக, நாம் அடிக்கடி உணவில் சேர்த்துக்கொள்ள வேண்டிய சத்தான உணவுகளில் கோதுமைப் புல்லும் ஒன்றாக இடம்பெறும்படி பார்த்துக்கொள்ளலாம்.

கோதுமைப் புல்லில் பலவிதமான நுண் ஊட்டச்சத்துகள் (Nutrients) உள்ளன. நோய் எதிர்ப்புத் திறனைத் தரும் உணவாகவும், பல்வேறு நோய்களைத் தடுக்கும் ஊட்டச்சத்து நிறைந்த உணவாகவும் இதை குறிப்பிட்ட இடைவெளிகளில் எடுத்துக்கொள்ளலாம். கோதுமைப் புல் சாப்பிட்டால் புற்றுநோய் முற்றிலுமாகக் குணமாகிவிடும் என்று சொல்வது தவறான தகவலாகும். வாழ்க்கைமுறை, உணவுப்பழக்கம் போன்றவற்றை ஆரோக்கியமாக வைத்துக்கொள்ளாமல், வெறும் கோதுமைப்புல் சாறு மட்டும் எடுத்துக்கொள்வது சரியானதும் அல்ல.  

கோதுமைப்புல் சாறு நல்லது என்றாலும் அதையும் அளவுக்கு அதிகமாக பருக வேண்டியதில்லை.  அருகம்புல் சாறு அருந்துவது போல, குறைவான அளவு மட்டும் எடுத்துக்கொண்டாலே இதன் முழுப் பலன்களையும் பெற முடியும்.

டாக்டர் விக்ரம் குமார்:
திருப்பத்தூர் மாவட்டம், ஆண்டியப்பனூர் அரசு சித்த மருத்துவப் பிரிவில் சித்த மருத்துவராகப் பணிபுரிபவர். சித்த மருத்துவத் துறையில் 16 ஆண்டுகள் அனுபவம் உள்ளவர்.

உங்கள் கேள்விகளை கமென்ட் பகுதியில் பகிர்ந்துகொள்ளுங்கள்; அதற்கான பதில்கள் தினமும் விகடன் இணையதளத்தில் #DoctorVikatan என்ற பெயரில் வெளியாகும்.   

மேலும் படிக்க »

இந்த செய்தியைப் பற்றிய கருத்தை பதிவு செய்யுங்கள். மேலும் இந்த செய்தியை உங்கள் நண்பர்களுடன் பகிர்ந்து கொள்ளுங்கள்.