ரஷ்யாவில் சீன அதிபருக்குத்தான்... ரஷ்யப் போரில் இந்திய மக்களும்..!- ஐ.நாவில் ஜெலன்ஸ்கி பேச்சு

தற்போது அமெரிக்காவின் நியூயார்க்கில் ஐக்கிய நாடுகளின் பொதுக்கூட்டம் நடந்து வருகிறது.

அந்தக் கூட்டத்தில் நேற்று ஜெலன்ஸ்கி பேசினார்.

தற்போது உலகத்தில் நடந்துவரும் போர்களில் ரஷ்ய-உக்ரைன் போரும் மிக முக்கியமான ஒன்று. இந்தப் போரை எப்படியாவது நிறுத்தத்திற்குக் கொண்டுவர வேண்டும் என்று உக்ரைன் அதிபர் ஜெலன்ஸ்கி நினைக்கிறார். ஆனால், அதற்கு ரஷ்ய அதிபர் புதின் ஒத்துவரவில்லை.

நேற்று ஐ.நாவிலும் உக்ரைன் போர் நிறுத்தத்தை நோக்கியே ஜெலன்ஸ்கியின் பேச்சு இருந்தது.

ஜெலன்ஸ்கி நேற்று பேசியதாவது...

“புதினுக்குச் செயல்பட எவ்வளவு சுதந்திரம் கிடைக்கிறதோ, அந்தளவுக்கு மற்றவர்களுக்கு உலகம் ஆபத்தானதாக மாறுகிறது.

அதனால்தான் நோயின் முதல் புள்ளியான அந்த மனிதரை உடனடியாகத் தடுக்க வேண்டும்.

நாங்கள் ஆயுதங்கள் மற்றும் தற்காப்பைப் பற்றி மட்டுமே தொடர்ந்து பேசுவதால், உக்ரைன் போரில் மட்டுமே கவனமாக இருப்பதாகச் சில நேரங்களில் தோன்றலாம். ஆனால், உக்ரேனியர்களாகிய நாங்கள் இந்தப் போரை விரும்பியதில்லை.

நாங்கள் மடிந்துபோகக் கூடாது என்பதற்காகவும்... எங்களது நாட்டை, குடும்பங்களை, சுதந்திரத்தை மற்றும் இறையாண்மையை இழந்துவிடக் கூடாது என்பதற்காகவுமே இந்த வழியைத் தேர்ந்தெடுத்தோம்.

சீன அதிபருக்குத்தான்!

துரதிர்ஷ்டவசமாக, இன்று அமெரிக்காவில் இருந்தும் சீனா அதிபருடன் நேரடியாகப் பேசும் வாய்ப்பு எங்களுக்குக் கிடைக்கவில்லை.

மற்றவர்களைக் காட்டிலும் ரஷ்யாவிடம் அதிக செல்வாக்கு அவருக்குத்தான் உள்ளது.

உக்ரைனுக்கு எதிரான போரில் கானா, நேபாளம், தஜிகிஸ்தான், இந்தியா, ஏமன், கென்யா, ஜிம்பாப்வே, கியூபா, பெலாரஸ், சூடான், தென்னாப்பிரிக்கா மற்றும் பல நாடுகளைச் சேர்ந்த 47 நாடுகளின் குடிமக்களை ரஷ்யா பயன்படுத்துகிறது என்பது எங்களுக்குத் தெரியும்.

ரஷ்யாவிற்கு இடம் தராதீர்கள்

இந்த 47 நாடுகளின் பிரதிநிதிகளுக்கும் நேரடியாக ஒன்று கூற விரும்புகிறேன். ரஷ்யா உங்கள் மக்களுக்கு என்ன செய்துகொண்டிருக்கிறது என்பது உங்களுக்குத் தெரியும்.

அவர்கள் உங்கள் நாட்டின் குடிமக்கள். அவர்களைப் பாதுகாக்கப் பாருங்கள். போர்க்களத்தில் அவர்கள் பலியாவதை அனுமதிக்காதீர்கள்.இந்தப் போருக்குள் உங்களையும் இழுக்க புதினுக்கு அனுமதி கொடுக்காதீர்கள்.

ரஷ்யா போர் செய்யவும், தங்களது முட்டாள்தனத்திற்காக உங்களின் மக்கள் உயிர்களைப் பலிகொடுக்கவும் ஒருபோதும் இடம் தராதீர்கள்.”

மேலும் படிக்க »

இந்த செய்தியைப் பற்றிய கருத்தை பதிவு செய்யுங்கள். மேலும் இந்த செய்தியை உங்கள் நண்பர்களுடன் பகிர்ந்து கொள்ளுங்கள்.