Age is Just a number Bro... 60 வயதிலும் இளமை: ரகசியம் சொல்லும் சுவான்டோ டான்

சிங்கப்பூரைச் சேர்ந்த புகைப்படக் கலைஞரும் மாடலுமான சுவான்டோ டான் (Chuando Tan), அண்மையில் தனது 60-வது பிறந்தநாளைக் கொண்டாடியுள்ளார். காலச்சக்கரம் பின்னோக்கிச் சுழல்வதைப் போன்ற இவரது இளமை மாறாத தோற்றம் தற்போது உலக அளவில் இணையதளங்களில் பேசுபொருளாகியுள்ளது.

பொதுவாக அறுபது வயதில் ஒருவருக்குத் தோன்றும் முதுமையின் அறிகுறிகளோ, நரையோ இவரிடம் துளியும் தென்படவில்லை. இதனால் வியப்படைந்த நெட்டிசன்கள், இவர் ஒரு "நிஜ காலத்து வாம்பயர்" என்று வர்ணித்து வருகின்றனர்.

இவரது இந்த அசாத்தியமான இளமைக்கு 70 சதவீதம் உணவுப் பழக்கமும், 30 சதவீதம் உடற்பயிற்சியுமே காரணம் என்று அவர் கூறுகிறார். தினமும் காலையில் ஆறு முட்டைகளைச் சாப்பிடுவதை வழக்கமாகக் கொண்டுள்ள அவர், கொழுப்பைக் குறைக்க அதில் நான்கு முட்டைகளின் வெள்ளைக்கருவை மட்டுமே எடுத்துக் கொள்கிறார்.

இது தவிர, சிக்கன், மீன் மற்றும் காய்கறிகள் அடங்கிய புரதம் நிறைந்த உணவுகளுக்கே முன்னுரிமை அளிக்கிறார். குறிப்பாக சர்க்கரை, காபி, மது மற்றும் சிகரெட் போன்ற பழக்கங்களை முற்றிலுமாகத் தவிர்ப்பது தனது ஆரோக்கியத்திற்கு முக்கியக் காரணம் என்று அவர் குறிப்பிடுகிறார்.

உணவுக்கு அடுத்தபடியாக, முறையான உடற்பயிற்சி இவரது வாழ்க்கைமுறையின் அங்கமாக உள்ளது. வாரத்திற்கு ஐந்து நாட்கள் ஜிம் சென்று கடுமையானப் பயிற்சிகளை மேற்கொள்வதோடு, தினமும் நீச்சல் பயிற்சியிலும் ஈடுபடுகிறார்.

வெறும் உடலளவில் மட்டுமன்றி, மனதளவிலும் ஆரோக்கியமாக இருக்க வேண்டியது அவசியம் என்று கருதும் சுவான்டோ, தினமும் அதிகாலை வரை விழித்திருப்பதைத் தவிர்த்து, இரவு 11 மணிக்கு முன்பே உறங்கச் செல்வதை ஒரு விதியாகவே வைத்துள்ளார். சரியான ஓய்வு உடலின் செல்களைப் புதுப்பித்து, இளமையைத் தக்கவைக்க உதவுவதாக அவர் நம்புகிறார்.

View this post on Instagram

A post shared by CHUANDO TAN 陈传多 (@chuando_chuandoandfrey)

தனது 60-வது பிறந்தநாள் குறித்துப் பேசிய அவர், வயது என்பது வெறும் எண்கள் மட்டுமே என்பதைத் தனது தோற்றத்தின் மூலம் நிரூபித்துள்ளார். அதே சமயம், தனது இளமைக்கு மரபணு ரீதியான காரணங்களும் ஒரு காரணமாக இருக்கலாம் என்பதை அவர் மறுப்பதற்கில்லை.

எதுவாக இருந்தாலும், முறையான உணவுக்கட்டுப்பாடும், விடாமுயற்சியுடன் கூடிய உடற்பயிற்சியும் இருந்தால் எவரும் ஆரோக்கியமான முதுமையை அடைய முடியும் என்பதற்குச் சுவான்டோ டான் ஒரு சிறந்த உதாரணமாகத் திகழ்கிறார்.

மேலும் படிக்க »

இந்த செய்தியைப் பற்றிய கருத்தை பதிவு செய்யுங்கள். மேலும் இந்த செய்தியை உங்கள் நண்பர்களுடன் பகிர்ந்து கொள்ளுங்கள்.