``அஸ்ஸாம் அரிசியில் ஆர்சானிக் விஷம் ?” சென்னைப் பல்கலைக்கழக பதிவாளர் தகவல்!

அண்மையில் இயற்கைமுறை உணவுகளின் பயன்பாட்டை அதிகரிக்க, பொதுமக்களுக்கும் இயற்கை உணவு (ORGANIC FOOD TO COMMON PEOPLE’S PLATE ) என்ற பயிலரங்கம் சென்னை பல்கலைக் கழகத்தில் நடைபெற்றது.

கிரியேட் (CREATE) அறக்கட்டளையுடன் சென்னை பல்கலைக்கழகத்தின் பொருளாதாரத் துறை மற்றும்ஆர்கானிக் ஃபார்மர்ஸ் மார்க்கெட் (OFM) இணைந்து அண்மையில் இந்நிகழ்ச்சிக்கு ஏற்பாடு செய்திருந்தன.

சென்னைப் பல்கலைக் கழகப் பொருளாதாரத் துறைப் பேராசிரியரும் தலைவருமான டாக்டர். இ.சின்னம்பாய் வரவேற்றார்.

சென்னைப் பல்கலைக்கழகப் பதிவாளர் முனைவர் ஏழுமலை தலைமை உரையுடன் தொடக்க அமர்வு தொடங்கியது. அவர் தன் உரையில்,

``பிரிட்டிஷ் காலனித்துவ காலத்தில் பின்பற்றப்பட்ட கொள்கைகள் நமது வளமான பல்லுயிர்ப் பெருக்கத்தை திட்டமிட்டு அழித்துள்ளது. ஒற்றைப்பயிர் முறையை ஆங்கிலேயர்கள் அறிமுகப்படுத்தினார்கள்.

உதாரணமாக, மலைகளின் உச்சியில் உள்ள பெரிய பகுதிகள் தேயிலை மற்றும் காபி தோட்டங்களாக மாற்றப்பட்டன. மேலும், பருத்தி போன்ற வணிக பயிர்களை ஆங்கிலேயர்கள் தங்கள் சொந்த தேவைகளுக்காக சமவெளிகளில் அறிமுகப்படுத்தினார்கள். இது மண்ணின் ஆரோக்கியம் மற்றும் சுற்றுச்சூழல் சீரழிவுக்கு வழிவகுத்தது.

மலைகளில் இருந்து பலவிதமான, ஆழமான வேரூன்றிய மரங்களின் அடுக்குகளை அகற்றியதால், சுற்றுச்சூழல் அமைப்புகளை சீர்குலைந்தது மட்டுமல்லாமல், மண்ணின் தன்மையையும் பாதித்தது. இதன் விளைவாக அடிக்கடி நிலச்சரிவுகள் மற்றும் இயற்கை பேரழிவுகள் ஏற்படுகின்றன.

அஸ்ஸாமில் நடத்தப்பட்ட ஆய்வில் பல முக்கிய உண்மைகள் தெளிவாகின. உணவு உற்பத்தியில் ரசாயனங்கள் மற்றும் செயற்கை உரங்களை கண்மூடித்தனமாக பயன்படுத்துவதால் ஏற்படும் விளைவுகள் குறித்து ஆய்வு செய்தனர். அங்கு உள்ள நெல் தானியங்களில் ஆர்சனிக் போன்ற மோசமான நச்சுத்தன்மை வாய்ந்த கன உலோகங்கள் இருப்பது ஆய்வில் தெரியவந்துள்ளது.

உணவு தானியங்களில் பூச்சிக்கொல்லி எச்சங்கள் அதிகரித்து வருவதையும் இது காட்டுகிறது. தாயின் தாய்ப்பாலில் கூட உணவு உற்பத்தியில் ரசாயனங்கள் மற்றும் செயற்கை உரங்களின் தடயங்கள் உள்ளன என்பது ஆய்வின் மூலம் தெரியவந்துள்ளது. நேரம் கிடைக்கும் போதெல்லாம் நான் விவசாயத்தில் ஈடுபட்டு வருகிறேன். அது எனக்கு மகிழ்ச்சியாகவும் ஆரோக்கியமாகவும் உள்ளது. பல்கலைக் கழகத்தில் பேராசிரியர் என்பதை விட, ஒரு விவசாயி என்று சொல்வதில் பெருமிதம் கொள்கிறேன்” என்றார்.

உணவு மற்றும் நுகர்வோர் பாதுகாப்புத்துறை கூடுதல் தலைமைச் செயலாளர் டாக்டர். ஜே. ராதாகிருஷ்ணன் பயிலரங்கைத் தொடங்கிவைத்து சிறப்புரையாற்றினார். அதில்,   

நாட்டு நலனுக்காக ஆராய்ச்சி செய்ய மாணவர்கள், ஆராய்ச்சியாளர்கள், கல்வியாளர்கள் மற்றும் அறிவியல் சமூகங்கள் அதிகம் முன்வர வேண்டும். இது இயற்கை விவசாயிகளுக்கு அவர்களின் விளைபொருள்களை சந்தைப்படுத்துவதற்கு உறுதுணையாக இருக்கும்.

உணவினால் ஏற்படும் நோய்களுக்குத் தீர்வுகாண சரியான உணவை உட்கொள்ள வேண்டும். அதற்கான விழிப்புணர்வை பொதுமக்களிடையே ஏற்படுத்தி வருகிறோம்.

நமது முன்னோர்கள் கடைசி முயற்சியாக மருந்துகளை உட்கொண்டனர்.  உடல் ஆரோக்கியத்தை பராமரிக்க உடற்பயிற்சி, உடல் செயல்பாடு, உணவு கட்டுப்பாடு போன்றவற்றுக்கு முக்கியத்துவம் அளித்தனர்.

அதற்கு மாறாக, இன்றைய தலைமுறையினர் மருத்துவத்தை தங்கள் முதல் விருப்பமாக எடுத்துக்கொள்கிறார்கள் மற்றும் ஆரோக்கியமாக இருக்க முதன்மையான முறையாக உடற்பயிற்சி மற்றும் சரியான உணவு ஆகியவற்றின் முக்கியத்துவத்தை புறக்கணிக்கிறார்கள்.

வளர்ந்து வரும் மக்கள்தொகையின் உணவுத் தேவைகளை பூர்த்தி செய்ய வேண்டும். அதன்  சமநிலையின் அவசியத்தை உணரவேண்டும். இயற்கை உணவு உற்பத்தியை ஊக்குவிக்கும் அதே வேளையில், விவசாயிகளை ஆதரிப்பதற்கு முறையான சந்தை ஆதரவு அமைப்பு உருவாக்கப்பட வேண்டும். அதற்கு தேவையான நடவடிக்கைகளை, முயற்சிகளை மேற்கொள்வோம் என்று உறுதியளித்தார்.

இந்நிகழ்ச்சியில் மருத்துவர்கள், ஊடகவியலாளர்கள், கல்வியாளர்கள், விவசாயிகள் கலந்துக் கொண்ட கலந்துரையாடலும் இடம் பெற்றது.

காவேரி மருத்துவமனை மற்றும் எஸ்.ஆர்.எம் மருத்துவமனையின் ஆலோசகர் மருத்துவர் டாக்டர். டி. சாய்ராமன், ஸ்ரீ முத்துக்குமரன் மருத்துவக் கல்லூரி மருத்துவமனை பேராசிரியர் டாக்டர் எஸ்.சம்பத் குமாரி, பசுமை விகடன் இணை ஆசிரியர்  பொன். செந்தில்குமார், பத்திரிகையாளர் சாவித்திரி கண்ணன், எத்திராஜ் மகளிர் கல்லூரியின் மருத்துவ ஊட்டச்சத்து மற்றும் உணவுமுறை துறை இணைப் பேராசிரியர் எம்.மேனகா , செயற்பாட்டாளர் அனந்து, முன்னோடி விவசாயி ஜெயச்சந்திரன்... உள்ளிட்டவர்கள் , ரசாயன விவசாய முறைகளால் ஏற்படும் பாதிப்புகள் மற்றும் சுற்றுச்சூழல் பிரச்னைகள், இயற்கை வேளாண்மை, பார்ம்பர்ய விதைகளின் நன்மைகள் ஆரோக்கியமான உணவை பொதுமக்களுக்கு   எடுத்துச் செல்வதற்கான எளிய வழிமுறைகள் குறித்து விளக்கி பேசினார்கள். தமிழ்நாடு மகளிர் கூட்டமைப்பின் (TNWC) தலைவர் ஷீலு பிரான்சிஸ் கலந்துரையாடலை நெறிப்படுத்தினார்.

மேலும் படிக்க »

இந்த செய்தியைப் பற்றிய கருத்தை பதிவு செய்யுங்கள். மேலும் இந்த செய்தியை உங்கள் நண்பர்களுடன் பகிர்ந்து கொள்ளுங்கள்.