Israel Election : உலகின் மிக விசித்திரமான தேர்தல் முறை — அக்டோபர் 27ல் என்ன நடக்கும்? | Explained

இஸ்ரேலில் இதுவரை ஒரு கட்சி கூட தனியாக ஆட்சி அமைத்ததில்லை. காரணம் அதன் தேர்தல் முறை.

உலகிலேயே மிகவும் விசித்திரமான, மிகவும் சிக்கலான தேர்தல் முறையைக் கொண்ட நாடுகளில் ஒன்று இஸ்ரேல்.

இஸ்ரேலின் நாடாளுமன்றம் `நெசெட். அந்த நெசெட் எப்படி வேலை செய்கிறது, பிரதமர் எப்படித் தேர்ந்தெடுக்கப்படுகிறார், 61 என்ற எண் ஏன் இவ்வளவு முக்கியம், அக்டோபர் 27, 2026 அன்று நடைபெறவுள்ள தேர்தலில் யார் யாரெல்லாம் போட்டியிடுகிறார்கள்...

விரிவாகப் பார்க்கலாம்.!

நெசெட் என்றால் என்ன? — ஒற்றை அவை, 120 உறுப்பினர்கள்!

இஸ்ரேலின் நாடாளுமன்றம் நெசெட் (Knesset) என்று அழைக்கப்படுகிறது. இதில் மொத்தம் 120 உறுப்பினர்கள் (Members of Knesset - MKs) இடம்பெற்றுள்ளனர். இந்தியா, அமெரிக்கா, பிரிட்டன் போன்ற நாடுகளில் மேலவை, கீழவை என இரண்டு அவைகள் இருப்பது போல் இஸ்ரேலில் இல்லை — இது ஒரு ஒற்றை அவையைக் (Unicameral) கொண்ட நாடாளுமன்றம். மேலும், அமெரிக்கா அல்லது ஆஸ்திரேலியா போன்ற கூட்டாட்சி நாடுகளில் இருப்பதுபோல, இஸ்ரேலில் பிராந்திய அல்லது மாநில அளவிலான சட்டமன்றங்கள் எதுவும் இல்லை. முழு தேசத்திற்குமான சட்டமியற்றும் அதிகாரம் நெசெட்டிடம் மட்டுமே உள்ளது.

இஸ்ரேல் ஒரு நாடாளுமன்ற ஜனநாயக முறையைப் (Parliamentary System) பின்பற்றுகிறது. மக்கள் நேரடியாக பிரதமரைத் தேர்ந்தெடுப்பதில்லை; நாடாளுமன்ற உறுப்பினர்களை மட்டுமே தேர்ந்தெடுக்கின்றனர். தேர்தலில் வெற்றிபெறும் கட்சிகள் இணைந்து அரசாங்கத்தை உருவாக்குகின்றன. பிரதமரும் அவரது அமைச்சரவையும் நெசெட்டிற்குப் பதிலளிக்கக் கடமைப்பட்டவர்கள்.

நெசெட்டின் முக்கியப் பணிகள்:

சட்டங்களை இயற்றுவது
அரசாங்கத்தின் செயல்பாடுகளைக் கண்காணிப்பது
நாட்டின் பட்ஜெட்டை நிறைவேற்றுவது
முக்கிய அதிகாரிகளைத் தேர்ந்தெடுப்பது
அரசாங்கத்தை அமைப்பது அல்லது நம்பிக்கையில்லாத் தீர்மானம் மூலம் கலைப்பது

மக்கள்தொகைக்கு ஏற்ப பார்த்தால், 120 உறுப்பினர்களைக் கொண்ட நெசெட் ஒப்பீட்டளவில் சிறிய நாடாளுமன்றமே. இதனால் ஒவ்வொரு உறுப்பினரும் பல குழுக்களில் பணியாற்ற வேண்டியிருப்பதால், பணிச்சுமையும் அதிகமாக உள்ளது.

விகிதாச்சாரப் பிரதிநிதித்துவம் — முழு நாடும் ஒரே தொகுதி தான்!

இஸ்ரேலின் தேர்தல் முறையின் மிக முக்கிய அம்சம் அதன் விகிதாச்சாரப் பிரதிநிதித்துவ முறை (Proportional Representation). அமெரிக்கா, இந்தியா அல்லது பிரிட்டனில் உள்ளது போல நாடு தனித்தனி தொகுதிகளாகப் பிரிக்கப்படுவதில்லை. மாறாக, முழு நாடும் ஒரே தேர்தல் தொகுதியாகக் கருதப்படுகிறது. வாக்காளர்கள் ஒரு குறிப்பிட்ட வேட்பாளருக்கு வாக்களிக்காமல், ஒரு கட்சியின் பட்டியலுக்கு (Party List) வாக்களிப்பார்கள்.

ஒவ்வொரு கட்சிப் பட்டியலும் பெறும் வாக்குகளின் சதவீதத்திற்கு ஏற்ப நெசெட்டில் இடங்களைப் பெறும். உதாரணமாக, ஒரு கட்சி 10% வாக்குகளைப் பெற்றால், அதற்கு நாடாளுமன்றத்தில் சுமார் 12 இடங்கள் (120ல் 10%) கிடைக்கும்.

இருப்பினும், ஒரு கட்சி இடங்களைப் பெற, மொத்த வாக்குகளில் குறைந்தபட்சம் 3.25% என்ற தேர்தல் நுழைவு வரம்பை (Electoral Threshold) தாண்டியிருக்க வேண்டும். இந்த நிபந்தனையை பூர்த்தி செய்ய முடியாத கட்சிகளின் வாக்குகள் வீணாகிவிடும் — இது சிறிய கட்சிகளை பெரிய கட்சிகளுடன் இணையவோ, கூட்டணி அமைக்கவோ தூண்டுகிறது.

இந்த முறையால், சிறிய கட்சிகள்கூட நாடாளுமன்றத்தில் பிரதிநிதித்துவம் பெறுவது எளிதாகிறது. இதன் விளைவாக, நெசெட் எப்போதும் பல கட்சிகளைக் கொண்ட பன்முகத்தன்மை வாய்ந்த அவையாகவே காணப்படுகிறது.


வேட்பாளர் பட்டியல் — கட்சிகள் எப்படித் தயார் செய்கின்றன?

இஸ்ரேலிய தேர்தல் சட்டப்படி, தேர்தலுக்குப் பின்னர் வேட்பாளர்களை அறிவிக்கவோ, மாற்றவோ முடியாது. எனவே தேர்தலுக்கு முன்பாகவே கண்டிப்பாக வேட்பாளர் பட்டியலை அறிவித்துவிட வேண்டும்.

தரவரிசைப் பட்டியல் (Ranked Party List): தேர்தலுக்கு சில வாரங்களுக்கு முன்பாகவே, ஒவ்வொரு கட்சியும் தங்கள் வேட்பாளர்களின் பெயர்களை 1 முதல் 120 வரை வரிசைப்படுத்தி (Ranked List) அதிகாரப்பூர்வமாகச் சமர்ப்பிக்க வேண்டும். எடுத்துக்காட்டாக, முதல் இடத்தில் கட்சியின் தலைவர் (பிரதமர் வேட்பாளர்) இருப்பார்; 2, 3, 4... என கட்சியின் முக்கியத் தலைவர்களும் வேட்பாளர்களும் அடுத்தடுத்து இடம்பெறுவார்கள்.

வெற்றி எவ்வாறு தீர்மானிக்கப்படுகிறது? தேர்தல் முடிவுகளின் அடிப்படையில் ஒரு கட்சிக்கு எத்தனை இடங்கள் கிடைக்கின்றனவோ, அந்த அளவிற்குப் பட்டியலில் உள்ள மேலிட வேட்பாளர்கள் நாடாளுமன்றத்திற்குச் செல்வார்கள். உதாரணமாக, ஒரு கட்சிக்கு 20 இடங்கள் கிடைத்தால், அப்பட்டியலில் உள்ள முதல் 20 பேர் நேரடியாக MK-களாகப் பதவி ஏற்பார்கள்; 21-வது இடத்தில் இருப்பவருக்கு இடம் கிடைக்காது.

வேட்பாளர்கள் எப்படித் தேர்ந்தெடுக்கப்படுகிறார்கள்?

ஒவ்வொரு கட்சியும் வெவ்வேறு வழிகளைப் பின்பற்றுகின்றன:

உள் கட்சித் தேர்தல் (Primaries): லிகுட் போன்ற கட்சிகள் கட்சி உறுப்பினர்களின் வாக்குகள் மூலம் வரிசையைத் தீர்மானிக்கின்றன.
தலைவரின் முடிவு: சில கட்சிகளில் கட்சித் தலைவரே வரிசையை நேரடியாக முடிவு செய்வார்.
மதக் குழுக்கள்: ஆன்மீக/மதக் குழுக்கள் (Council of Torah Sages / Shura Council) வேட்பாளர்களைத் தேர்வு செய்யும்


தேர்தல் எவ்வளவு அடிக்கடி நடக்கும்?

சட்டப்படி, நெசெட் தேர்தல் நான்கு ஆண்டுகளுக்கு ஒருமுறை நடத்தப்பட வேண்டும். ஆனால் அரசியல் ஸ்திரத்தன்மை இல்லாததாலும், கூட்டணிகள் முறிவதாலும், இஸ்ரேலில் முன்கூட்டியே தேர்தல்கள் நடைபெறுவது மிகவும் சாதாரணமாகிவிட்டது. 1996 முதல் 2022 வரை, சராசரியாக ஒவ்வொரு 2.4 வருடங்களுக்கும் ஒருமுறை தேர்தல் நடந்துள்ளது. இது நாடாளுமன்ற ஜனநாயக நாடுகளில் மிக அடிக்கடி தேர்தல் நடக்கும் நாடுகளில் ஒன்றாக இஸ்ரேலை மாற்றியுள்ளது.

போர் போன்ற அசாதாரண சூழ்நிலைகளில் மட்டுமே, 80 உறுப்பினர்களின் ஆதரவுடன் தேர்தலை ஒத்திவைக்க முடியும். 1973 யோம் கிப்பூர் போரின்போது ஒருமுறை மட்டுமே தேர்தல் ஒத்திவைக்கப்பட்டது.

வாக்குப்பதிவு நாளன்று பெரும்பாலான தொழிலாளர்களுக்கு விடுமுறை அளிக்கப்படுகிறது. வாக்குச்சாவடிகளில் காகித வாக்குச்சீட்டுகளைப் பயன்படுத்தி ரகசியமாக வாக்குப்பதிவு நடைபெறுகிறது. வெளிநாடுகளில் வசிக்கும் பெரும்பாலான இஸ்ரேலியர்கள் வாக்களிப்பதற்காக நாட்டிற்குத் திரும்ப வேண்டும். அரசு ஊழியர்கள், ராணுவ வீரர்கள் மற்றும் மருத்துவமனைகளில் உள்ள நோயாளிகள் போன்ற சில பிரிவினருக்கு மட்டும் சிறப்பு வாக்களிப்பு ஏற்பாடுகள் செய்யப்பட்டுள்ளன.



61 என்ற மந்திர எண் — பிரதமரை தீர்மானிப்பது யார்?

தேர்தல் முடிவுகள் அறிவிக்கப்படுவது அரசியல் சதுரங்கத்தின் முதல் நகர்வு மட்டுமே. உண்மையான அரசியல் ஆட்டம் அதற்குப் பிறகுதான் தொடங்குகிறது. இஸ்ரேலின் வரலாற்றில் இதுவரை எந்தவொரு கட்சியும் 61 அல்லது அதற்கு மேற்பட்ட இடங்களை வென்று தனித்து ஆட்சி அமைத்ததில்லை. இதனால் பிரதமரைத் தீர்மானிப்பதில் கூட்டணிகள் மிக அவசியமாகின்றன.

தேர்தல் முடிவுகளுக்குப் பிறகு, நாட்டின் ஜனாதிபதி அனைத்துக் கட்சிகளுடனும் ஆலோசனை நடத்துவார். யாருக்கு அதிக ஆதரவு இருக்கிறது என்பதை மதிப்பீடு செய்து, ஒரு கட்சித் தலைவருக்கு ஆட்சியமைக்க அழைப்பு விடுத்து 28 நாட்கள் அவகாசம் வழங்குவார். தேவைப்பட்டால் மேலும் 14 நாட்கள் நீட்டிக்கப்படலாம்.

அழைப்பு பெற்ற தலைவர், மற்ற கட்சிகளுடன் பேச்சுவார்த்தை நடத்தி, குறைந்தபட்சம் 61 உறுப்பினர்களின் ஆதரவைத் திரட்ட வேண்டும். இதற்காக ஆதரவளிக்கும் கட்சிகளுக்கு அமைச்சரவையில் இடங்கள், நெசெட் குழுக்களில் தலைமைப் பதவிகள் மற்றும் அவர்களின் கொள்கைகளை நிறைவேற்றுவதற்கான உறுதிமொழிகள் வழங்கப்படும். கூட்டணி உடன்பாடு எட்டப்பட்ட பிறகு, நெசெட்டில் நம்பிக்கை வாக்கெடுப்பு நடத்தப்பட்டு புதிய பிரதமர் மற்றும் அமைச்சரவை பதவியேற்கும்.

ஆட்சியமைக்க அழைக்கப்பட்ட தலைவர் தோல்வியுற்றால், ஜனாதிபதி மற்றொரு தலைவருக்கு வாய்ப்பளிக்கலாம். அதிலும் யாரும் வெற்றிபெறவில்லை என்றால், நெசெட் கலைக்கப்பட்டு நாடு மீண்டும் தேர்தலைச் சந்திக்கும்.

இந்த சிக்கலான அமைப்பு காரணமாகவே, இஸ்ரேலிய அரசியல் களம் அடிக்கடி நிலையற்ற தன்மையுடன் காணப்படுகிறது. பட்ஜெட்டை நிறைவேற்றத் தவறினால் அல்லது நெசெட்டைக் கலைக்கும் மசோதா வெற்றி பெற்றால், ஒரு அரசாங்கம் கவிழ்க்கப்பட்டு முன்கூட்டியே தேர்தல் நடத்தப்படலாம். எனவே, இஸ்ரேலில் அரசாங்கம் அமைவது எவ்வளவு கடினமோ, அது நீடிப்பதும் அதே அளவு சவாலானதே.

வாக்குப்பதிவு எப்படி நடக்கும்?  

வாக்கு உறை (Envelope): வாக்குச்சாவடிக்குச் செல்லும் வாக்காளருக்கு ஒரு காலியான வாக்கு உறை மட்டுமே அதிகாரிகளால் வழங்கப்படும்.  

கட்சிச் சீட்டுகள் (Party Slips / Pitka): வாக்களிக்கும் திரைக்குப் பின்னால், தேர்தலில் போட்டியிடும் அனைத்துக் கட்சிகளுக்குமான (சுமார் 30–40 கட்சிகள்) தனித்தனி காகிதத் துண்டுகள் ஒரு பெரிய தட்டில் அடுக்கி வைக்கப்பட்டிருக்கும்.  

எழுத்துச் குறியீடு (Party Symbol): ஒவ்வொரு சீட்டிலும் கட்சியின் பெயர் மற்றும் அக்கட்சிக்கு ஒதுக்கப்பட்ட 1 முதல் 4 எபிரேய (Hebrew) அல்லது அரபு எழுத்துக்கள் மட்டுமே பெரியதாக அச்சிடப்பட்டிருக்கும். (உதாரணமாக: Likud கட்சிக்கு מחל - Mahal என்ற எழுத்துக்கள் இருக்கும்).  

வாக்கு செலுத்துதல்: வாக்காளர் தங்களுக்குப் பிடித்த கட்சியின் சீட்டை மட்டும் எடுத்து, உறையினுள் வைத்து ஒட்டி, வெளியே வந்து பெட்டியில் போடுவார்.  

அக்டோபர் 27, 2026 தேர்தல் — களத்தில் யார் யார்?

இஸ்ரேலின் 26-வது நெசெட் தேர்தல் அக்டோபர் 27, 2026 அன்று நடைபெறவுள்ளது. இறுதி வேட்பாளர் பட்டியல் தாக்கல் செப்டம்பர் 8 அன்று முடிந்த பிறகு, மொத்தம் 35 கட்சிகள் மற்றும் கூட்டணிகள் வரை தேர்தலில் அதிகாரப்பூர்வமாகப் போட்டியிடுகின்றன. இஸ்ரேலில் நூற்றுக்கும் மேற்பட்ட பதிவு செய்யப்பட்ட கட்சிகள் இருந்தாலும், சிறிய கட்சிகள் ஒன்றிணைந்து கூட்டணிகளாகப் போட்டியிடுவதால் வாக்குச்சீட்டில் வேட்பாளர் பட்டியல்களின் எண்ணிக்கை குறைகிறது.


2026 தேர்தலில் களம் காணும் முக்கியக் கட்சிகள் / கூட்டணிகள்:

லிக்குட் (Likud): தற்போதைய பிரதமர் பெஞ்சமின் நெதன்யாகு தலைமையிலான ஆளும் வலதுசாரி கட்சி.

யஷார் / டுகெதர் (Yashar / Together): முன்னாள் பிரதமர் நப்தாலி பென்னட் மற்றும் யாயிர் லேபிட் தலைமையிலான எதிர்க்கட்சி கூட்டணி.

தி டமாக்கிரட்ஸ் (The Democrats): யாயிர் கோலன் தலைமையிலான இடதுசாரி கூட்டணி.

புளூ அண்ட் ஒயிட் (Blue and White): பென்னி கேன்ட்ஸ் தலைமையிலான கட்சி.

ஜாயிண்ட் லிஸ்ட் (Joint List): அரபு சமூகக் கட்சிகளின் கூட்டணி (ஹடாஷ், தஆல், பலத்).

ராஅம் (Raam): மன்சூர் அப்பாஸ் தலைமையிலான தனித்து போட்டியிடும் அரபு கட்சி.

ஷேஸ் (Shas) & யுனைடெட் டோரா ஜூடாயிசம் (UTJ): யூத மத பழமைவாதக் கட்சிகள்.

ஓட்சுமா யெஹுடித் & ரிலீஜியஸ் சீயோனிஸ்ட் (RZP-Zehut): தீவிர வலதுசாரி தேசியவாதக் கட்சிகள்.

இஸ்ரேல் பெய்ட்டேனு (Yisrael Beiteinu): அவிக்டோர் லைபர்மேன் தலைமையிலான கட்சி.

அம்ச யிஸ்ரேல் (Amcha Yisrael): முன்னாள் ராணுவ அதிகாரி ஓஃபர் வின்டர் புதிதாகத் தொடங்கிய கட்சி.

மேலும் படிக்க »

இந்த செய்தியைப் பற்றிய கருத்தை பதிவு செய்யுங்கள். மேலும் இந்த செய்தியை உங்கள் நண்பர்களுடன் பகிர்ந்து கொள்ளுங்கள்.