TNPL 2026: முதல் 3 பந்தில் 3 விக்கெட்... சுருண்ட திருச்சி! இறுதிப்போட்டிக்குள் கெத்தாக நுழைந்த கோவை!

ஒரு பக்கம் 183 ரன்கள்... மறுபக்கம் 99 ரன்கள்! அதிலும் திருச்சி அணியின் முதல் மூன்று பேட்டர்களும் சந்தித்த முதல் மூன்று பந்துகளிலேயே அடுத்தடுத்து ஆட்டமிழந்ததுதான் இந்தப் போட்டியின் மிகப்பெரிய திருப்பம். சென்னை சேப்பாக்கத்தில் நடந்த TNPL 2026 இரண்டாவது தகுதிச்சுற்றில், திருச்சி கிராண்ட் சோழாஸை 84 ரன்கள் வித்தியாசத்தில் வீழ்த்தி VIDA கோவை கிங்ஸ் இறுதிப்போட்டிக்குள் நுழைந்திருக்கிறது.

டாஸ் வென்ற கோவை முதலில் பேட்டிங்கைத் தேர்வு செய்தது. தொடக்கத்தில் இருந்தே திருச்சி பந்துவீச்சாளர்களுக்கு சவால் கொடுத்தனர் கோவை பேட்டர்கள்.

எஸ். ராதாகிருஷ்ணன் 34 பந்துகளில் 48 ரன்களும், சுரேஷ் லோகேஷ்வர் 44 பந்துகளில் 66 ரன்களும் விளாசினர். லோகேஷ்வரின் அதிரடி இன்னிங்ஸில் 8 பவுண்டரிகளும் ஒரு சிக்ஸரும் இடம்பெற்றன.

அதன்பிறகு கேப்டன் ஷாருக்கான் களமிறங்கி வெறும் 18 பந்துகளில் 34 ரன்கள் விளாசினார். இதில் 3 பவுண்டரிகளும் 2 சிக்ஸர்களும் அடக்கம். அவரது அதிரடி காரணமாக கடைசி ஓவர்களில் ரன்ரேட் எகிற, 20 ஓவர்கள் முடிவில் கோவை 183/5 என்ற வலுவான ஸ்கோரை எட்டியது.

வந்தார் சென்றார்…திருச்சிக்கு ஆரம்பமே அதிர்ச்சி

184 ரன்கள் என்ற இலக்கை துரத்திக் களமிறங்கிய திருச்சி அணிக்கு தொடக்கமே அதிர்ச்சி காத்திருந்தது. முதல் பந்திலேயே கே. ராஜ்குமார் டக் அவுட் ஆக, அடுத்த பந்தில் ஷ்யாம் சுந்தரும் ஆட்டமிழந்தார். மூன்றாவது பந்தில் ஜெகதீசன் கௌசிக் விக்கெட்டையும் வீழ்த்திய கே. தீபன் லிங்கேஷ், தனது முதல் ஓவரின் முதல் மூன்று பந்துகளிலேயே ஹாட்ரிக் விக்கெட்டுகளை வீழ்த்தி மிரட்டினார்.

அடுத்தடுத்து விழுந்த இந்த மூன்று விக்கெட்டுகளால் நிலைகுலைந்த திருச்சி அணியால், அந்த அதிர்ச்சியிலிருந்து கடைசி வரை மீள முடியவில்லை

திருச்சி கேப்டன் சுரேஷ் குமார் மட்டும் 27 பந்துகளில் 48 ரன்கள் விளாசி போராடினார். ஆனால் மறுமுனையில் விக்கெட்டுகள் சரிந்துகொண்டே இருந்தன. மறுப்பும் கோவை பந்துவீச்சாளர் மணிமாறன் சித்தார்த் 4 ஓவர்களில் வெறும் 11 ரன்கள் மட்டுமே கொடுத்து 4 விக்கெட்டுகளை கைப்பற்றினார்.

இறுதியில் 15.4 ஓவர்களில் 99 ரன்களுக்கு ஆல் அவுட் ஆனது திருச்சி. இதன்மூலம் 84 ரன்கள் வித்தியாசத்தில் வென்ற கோவை இறுதிப்போட்டிக்குள் கெத்தாக நுழைந்தது. மேலும் இப்போட்டியின் ஆட்டநாயகன் விருதை கே. தீபன் லிங்கேஷ் பெற்றார்.

திருச்சியை வீழ்த்தி இறுதி போட்டிக்குள் நுழைந்த கோவை, இப்போது கோப்பைக்காக மதுரை பேந்தர்ஸை எதிர்கொள்கிறது. ஆகஸ்ட் 28-ம் தேதி சேப்பாக்கத்தில் நடக்கும் இறுதிப்போட்டியில், இந்த சீசனின் சாம்பியன் யார் என்ற எதிர்பார்ப்பு எழுந்துள்ளது.

மேலும் படிக்க »

இந்த செய்தியைப் பற்றிய கருத்தை பதிவு செய்யுங்கள். மேலும் இந்த செய்தியை உங்கள் நண்பர்களுடன் பகிர்ந்து கொள்ளுங்கள்.