90 செஷன்கள்; தோள்பட்டை மூட்டு விலகல் - டிசி படத்திற்காக லோகேஷ் கனகராஜின் டிரான்ஸ்பர்மேஷன்!

லோகேஷ் கனகராஜ் நடித்துள்ள டிசி படம் வசூலை அள்ளி வருகிறது. வாமிகா கேபி, கிரிஷ் தயாள், தலைவாசல் விஜய் ஆகியோர் நடித்துள்ள இந்தப் படத்தை அருண் மாதேஷ்வரன் இயக்கியிருந்தார்.

இப்படத்திற்கு அனிருத் இசையமைத்த பாடல்களும், பின்னணி இசையும் பெரிதும் பாராட்டப்பட்டன. இந்தப் படத்திற்காக லோகேஷ் கனகராஜ் உடலளவில் தயாரான வீடியோவை செலிபிரிட்டி டிரெய்னர் சந்தீப், அவருடைய யூடியூப் சேனலில் பகிர்ந்திருக்கிறார்.

அந்தக் காணொளியில் சந்தீப், "இந்த உடலமைப்பின் டிரான்பர்மேஷனுக்காக 50 நாட்களில் 90 செஷன்கள் கடுமையாக உழைத்திருக்கிறார் லோகேஷ் கனகராஜ்.

காலையிலும் மாலையிலும் ஜிம்மிற்குச் சென்று உடற்பயிற்சி செய்வது சாதாரண விஷயம் இல்லை. தினமும் ஜிம்மில் முழுமையாக உடற்பயிற்சி செய்துவிட்டு, அதே எனர்ஜியோடு அடுத்த நாளுக்கும் தயாராவது ரொம்பவே கஷ்டமான விஷயம்" எனப் பகிர்ந்திருக்கிறார்.

டிசி படத்திற்காக லோகேஷ் கனகராஜ் சிரத்தை எடுத்துத் தயாரானது பற்றி இயக்குநர் அருண் மாதேஷ்வரன், "அவர் இந்தப் படத்திற்காகக் கடுமையாக உழைத்திருக்கிறார். நான் அவரிடம் கூறிய ஒரே விஷயம், நீங்கள் நீங்களாகவே இருங்கள் என்பதுதான்.

லோகேஷிற்கு எப்போது கோபம் வரும், எப்போது சோகமாக உணர்வார் என்பதை மையமாக வைத்தே தேவதாஸ் கதாபாத்திரத்தை லோகேஷ் செய்ய வேண்டும் என்று நான் விரும்பினேன். அதில் அவர் தனது முழு உழைப்பையும் அளித்திருக்கிறார்" எனப் பகிர்ந்திருக்கிறார்.

இப்படியான கடுமையான உடற்பயிற்சிக்கு மத்தியில், வேறொரு சமயத்தில் அவருக்கு எதிர்பாராத விதமாகத் தோள்பட்டை மூட்டு விலகல் ஏற்பட்டிருக்கிறது.

இதனைக் கருத்தில் கொண்டு, இதற்கேற்ப அவர் உடற்பயிற்சி செய்ததாகவும் பயிற்சியாளர் சந்தீப் பகிர்ந்திருக்கிறார்.

மேலும் படிக்க »

இந்த செய்தியைப் பற்றிய கருத்தை பதிவு செய்யுங்கள். மேலும் இந்த செய்தியை உங்கள் நண்பர்களுடன் பகிர்ந்து கொள்ளுங்கள்.