டிஜிட்டல் மோசடியில் கிடைத்த ரூ.10 கோடி; 5435 வங்கி கணக்குகளுக்கு மாற்றிய சோசியல் மீடியா பிரபலம் கைது
இந்த ஆண்டு ஜனவரி மாதம் சிபிஐ அதிகாரிகளாக தங்களைக் காட்டிக் கொண்ட ஒரு கும்பல் புனேயைச் சேர்ந்த முதியவரை டிஜிட்டலில் கைது செய்து ரூ.10 கோடியைப் பறித்தது.
முதியவர் ஒரு வழக்கில் குற்றம் சாட்டப்பட்டுள்ளதாகவும், சட்ட நடவடிக்கையைத் தவிர்க்க அவரது வங்கிக்கணக்கில் இருந்த ரூ.10.74 கோடியைத் தாங்கள் சொல்லும் பல்வேறு வங்கிக் கணக்குகளுக்கு மாற்றும்படி கூறியது.
விசாரணைக்கு பணம் திரும்ப கொடுக்கப்படும் என்றும் தெரிவித்தனர். அவர்கள் சொன்னபடி முதியவரும் ரூ. 10.47 கோடியை டிரான்ஸ்பர் செய்தார். ஆனால் அக்கும்பல் சொன்னபடி பணத்தைத் திரும்ப கொடுக்கவில்லை.
இதையடுத்து தான் ஏமாற்றப்பட்டதை உணர்ந்து இது குறித்து போலீஸில் புகார் செய்தார். அதன் அடிப்படையில் சைபர் பிரிவு போலீஸார் வழக்குப் பதிவு செய்து விசாரித்து வந்தனர். விசாரணையில் இம்மோசடியில் தொடர்புடைய நபர் ஒருவர் ஏ.டி.எம். மூலம் பணம் எடுப்பது தெரிய வந்தது.
இதையடுத்து நடத்தப்பட்ட விசாரணையில், ஹர்ஷத் சுபாஷ் தான்டோல், சமர்த் சுரேஷ் தேஷ்முக், அமர் சிவாஜி அட்டர்கி ஆகிய 3 பேர் கைது செய்யப்பட்டனர்.
விசாரணையில், தான்டோல், ஏ.டி.எம். மூலம் எடுத்த பணத்தை ரோஹன் ஜாதவ் என்பவரிடம் கொடுத்தது தெரியவந்தது. இம்மோசடியில், ரோஹன் ஜாதவ் மூளையாகச் செயல்பட்டது தெரிய வந்தது.
இதையடுத்து ரோஹன் ஜாதவின் வங்கிக்கணக்குகள் அனைத்தையும் போலீஸார் முடக்கினர். சோசியல் மீடியா பிரபலமான ரோஹன் ஜாதவ் அனைத்து வங்கிக்கணக்கையும் முடக்கியதால் நீதிமன்றத்தில் சரணடைந்தார்.
சத்ரபதி சம்பாஜிநகரைச் சேர்ந்த ஜாதவ், மோசடி செய்யப்பட்ட ரூ.10.74 கோடியை மொத்தம் 5,436 வங்கிக் கணக்குகளுக்கு மாற்றியது விசாரணையில் தெரிய வந்தது. அதோடு டெலிகிராம் செயலி மூலம் ஹாங்காங்கில் உள்ள நபர்களுடன் தொடர்பில் இருந்த அவர், அவர்களுடன் அடிக்கடி வீடியோ கால்களில் பேசியது விசாரணையில் தெரியவந்தது.
ஜாதவ் தனது ஹாங்காங் கூட்டாளிகளுடன் சேர்ந்து கொண்டு டிஜிட்டல் கிரிப்டோகரன்சி மூலம் நிதி பரிவர்த்தனைகளை மேற்கொண்டதாகவும், இந்தியாவில் இருந்து வெளிநாட்டு நாணயத்திற்கு பணத்தை மாற்றுவதற்குக் கணிசமான கமிஷன் பெற்றதாகவும் போலீசார் தெரிவித்தனர்.
ஜாதவ் மீது புனே மற்றும் பிம்ப்ரி ஆகிய இரண்டு இடங்களில் இரண்டு வழக்குப் பதிவு செய்யப்பட்டுள்ளது.
மேலும் படிக்க »
இந்த செய்தியைப் பற்றிய கருத்தை பதிவு செய்யுங்கள். மேலும் இந்த செய்தியை உங்கள் நண்பர்களுடன் பகிர்ந்து கொள்ளுங்கள்.
