தோல்விக்கு ரசிகர்களிடம் மன்னிப்பு கேட்ட அந்த பண்பு.! - உலகை திரும்பிப் பார்க்க வைத்த ஜப்பானியர்கள்

ஃபிஃபா உலகக் கோப்பை 2026 தொடரிலிருந்து ஜப்பான் அணி வெளியேறிவிட்டது. ரவுண்ட் ஆஃப் 32 போட்டியில், பிரேசிலிடம் 2-1 என்ற கோல் கணக்கில் ஜப்பான் தோல்வியைத் தழுவியது. ஆனால், ஆட்டம் முடிந்த பிறகு மைதானத்தில் நடந்த உணர்ச்சிப்பூர்வமான சில காட்சிகள், உலகெங்கிலும் உள்ள கால்பந்து ரசிகர்களின் மனதை வென்றுள்ளது.

ரசிகர்களுக்குத் தலைவணங்கிய வீரர்கள்!

போட்டி முடிந்ததும், ஜப்பானிய அணியின் தலைமைப் பயிற்சியாளர் ஹஜிமே மோரியாசு, தனது வீரர்களை மைதானத்தின் மையத்திற்கு அழைத்துச் சென்றார். அங்கு அவர்களிடம் சில வார்த்தைகள் பேசிய பிறகு, அணியினரைத் தங்களின் ரசிகர் பட்டாளம் இருந்த பகுதிக்கு அழைத்துச் சென்றார்.

தங்களின் உலகக் கோப்பைப் பயணம் முழுவதும் பெரும் ஆதரவளித்த ரசிகர்களுக்கு முன்னால், உணர்ச்சிவசப்பட்ட நிலையில் காணப்பட்ட பயிற்சியாளர் மோரியாசு, ஆழமாகக் குனிந்து தலைவணங்கி நன்றி தெரிவித்தார். அவரைப் பின்தொடர்ந்து, அணியின் ஒவ்வொரு வீரரும் தலைவணங்கி மரியாதை செலுத்தினர். இந்த ஒரு செயல், தோல்வியின் வலியைத் தாண்டி அவர்களின் பண்பை உலகிற்குப் பறைசாற்றியது.

கடைசி நிமிடத்தில் கைநழுவிய வெற்றி

போட்டியின் முதல் பாதியில் கைஷு சானோ அடித்த கோல் மூலம் ஜப்பான் முன்னிலை பெற்றது. அதன்பிறகு, பிரேசிலின் தொடர் தாக்குதல்களைத் தங்களின் சிறப்பான தற்காப்பு ஆட்டத்தால் நீண்ட நேரம் தடுத்து நிறுத்தினர். ஜப்பானின் இந்த ஒழுங்கமைக்கப்பட்ட ஆட்டம், பிரேசில் அணிக்கு பெரும் சவாலாக அமைந்தது. இருப்பினும், ஆட்டத்தின் இரண்டாம் பாதியில் காசெமிரோ ஒரு கோல் அடித்து போட்டியை சமன் செய்தார். ஆட்டம் கூடுதல் நேரத்திற்குச் செல்லும் என எதிர்பார்க்கப்பட்ட நிலையில், போட்டியின் கடைசி நிமிடங்களில் (ஸ்டாப்பேஜ் டைம்) கேப்ரியல் மார்டினெல்லி கோல் அடித்து பிரேசிலின் வெற்றியை உறுதி செய்தார். இந்தத் தோல்வி, உலகக் கோப்பையின் நாக் அவுட் சுற்றில் முதல் வெற்றியைப் பதிவு செய்ய வேண்டும் என்ற ஜப்பானின் கனவைத் தகர்த்தது.

தோல்வி என்பது விளையாட்டின் ஒரு பகுதிதான். ஆனால், அந்தத் தோல்வியை ஏற்கும் விதம் இருக்கிறதே, அதுதான் ஒரு அணியின் உண்மையான குணத்தைக் காட்டும்.

அந்த வகையில், ஆட்டத்தில் தோற்றாலும், தங்களின் பணிவாலும், ரசிகர்களுக்குக் காட்டிய மரியாதையாலும் ஜப்பான் அணி அனைவரின் இதயங்களையும் வென்றுள்ளது. அவர்களின் இந்தச் செயல், கால்பந்து உலகில் நீண்ட காலத்திற்கு நினைவுகூரப்படும் என்பதில் சந்தேகமில்லை.

மேலும் படிக்க »

இந்த செய்தியைப் பற்றிய கருத்தை பதிவு செய்யுங்கள். மேலும் இந்த செய்தியை உங்கள் நண்பர்களுடன் பகிர்ந்து கொள்ளுங்கள்.