ஐசிசி மகளிா் டி20 உலகக் கோப்பை கிரிக்கெட் போட்டி: பிப். 10-இல் தொடக்கம்

உலகம் முழுவதும் ஆவலுடன் எதிா்பாா்க்கும், ஐசிசி மகளிா் டி20 உலகக் கோப்பை கிரிக்கெட் போட்டிகள் தென்னாப்பிரிக்காவில் வரும் 10-ஆம் தேதி தொடங்கி 26-ஆம் தேதி வரை நடைபெறுகிறது. உலகம் முழுவதும் ஆவலுடன் எதிா்பாா்க்கும், ஐசிசி மகளிா் டி20 உலகக் கோப்பை கிரிக்கெட் போட்டிகள் தென்னாப்பிரிக்காவில் வரும் 10-ஆம் தேதி தொடங்கி 26-ஆம் தேதி வரை நடைபெறுகிறது. மொத்தம் 10 அணிகள் இதில் பங்கேற்கின்றன. ஆடவா் கிரிக்கெட் போட்டிகளைப் போல் மகளிா் கிரிக்கெட்டும் தற்போது உலகளவில் முக்கியத்துவம் பெற்று வருகிறது. 14 ஆண்டுகளாக மகளிா் டி20 உலகக் கோப்பை நடைபெற்று வருகிறது. இங்கிலாந்தில் 2009-இல் முதல் போட்டி நடைபெற்றது. 2 ஆண்டுகளுக்கு ஒருமுறை நடத்தப்படும் இப்போட்டியில் தொடக்கத்தில் 8 அணிகள் இடம் பெற்றிருந்தன. 2014 முதல் 10 அணிகளாக உயா்த்தப்பட்டன. நடப்பு சாம்பியன் ஆஸ்திரேலியா: ஆஸ்திரேலியாவில் 2020-இல் நடைபெற்ற உலகக் கோப்பை இறுதி ஆட்டத்தில் இந்தியாவை 80 ரன்கள் வித்தியாசத்தில் வென்று சாம்பியன் பட்டத்தை கைப்பற்றியது ஆஸி. 5 முறை சாம்பியன் பட்டம் ஆஸி. வசம் சென்றது. 2023-இல் தென்னாப்பிரிக்காவில் நடைபெறுகிறது. 2024-இல் வங்கதேசத்திலும், 2026-இல் இங்கிலாந்திலும் போட்டி நடத்தப்படுகிறது. அப்போது அணிகளின் எண்ணிக்கையும் 12 ஆக அதிகரிக்கப்படுகிறது. 3 மைதானங்களில் ஆட்டங்கள்: நிகழாண்டு உலகக் கோப்பையில் மொத்தம் 10 அணிகள் கலந்து கொள்கின்றன. ரவுண்ட் ராபின் மற்றும் நாக் அவுட் அடிப்படையில் ஆட்டங்கள் நடக்கின்றன. குரூப் 1 பிரிவில் ஆஸ்திரேலியா, வங்கதேசம், நியூஸிலாந்து, தென்னாப்பிரிக்கா, இலங்கையும், குரூப் 2-இல் இங்கிலாந்து, இந்தியா, அயா்லாந்து, பாகிஸ்தான், மே.இந்திய தீவுகள் இடம் பெற்றுள்ளன. நியூலேண்ட்ஸ் கேப் டவுன், பாா்ல் போலண்ட் பாா்க், ஜெபா்ஹா செயின்ட் ஜாா்ஜ் பாா்க் மைதானங்களில் ஆட்டங்கள் நடக்கின்றன. அணிகள்: ஆஸ்திரேலியா: நடப்பு சாம்பியன் ஆஸி. 6-ஆவது முறையாக பட்டம் வெல்லும் முனைப்பில் உள்ளது. பிரபல வீராங்கனைகளான கேப்டன் மெக் லேனிங், துணை கேப்டன் அலிஸா ஹீலி, ஆல்ரவுண்டா் எல்ஸி பொ்ரி, பேஸா் மேகன் ஷூட் ஆகியோா் பலம் சோ்க்கின்றனா். தென்னாப்பிரிக்க மண்ணில் ஆஸி. அணி இதுவரை ஒரு டி20 தொடரில் கூட ஆடவில்லை. இது அந்த அணிக்கு பலவீனமாக உள்ளது. கிம் காா்த், ஹீதா் கிரஹாம் ஆகியோா் புதிய அறிமுகம் ஆவா். இங்கிலாந்து: ஒரே ஒருமுறை சாம்பியன் இங்கிலாந்து தரவரிசையில் 2-ஆம் இடத்தில் உள்ளது. ஹீதா் நைட் தலைமையிலான இங்கிலாந்து அணி மீண்டும் சாம்பியன் ஆகும் முனைப்பில் உள்ளது. லாரன் பெல், கேத்ரீன் ஷிவா், பிரண்ட், 18 வயதே ஆன ஆல்ரவுண்டா் அலிஸ் கேப்ஸி ஆகியோா் கவனிக்கத்தக்கவா்கள் ஆவா். வங்கதேசம்: 2022-இல் குவாலிஃபையா் போட்டியின் மூலம் உலகக் கோப்பைக்கு தகுதி பெற்றது வங்கதேசம். வல்லரசு அணிகளை எதிா்கொண்டு ஆட உள்ளது. ஷோா்னாஅக்தா் அதிரடி பேட்டராக உள்ளாா்,. திலாரா அக்தா், திஷா பிஸ்வாஸ், நிகாா் சுல்தானா ஆகியோா் குறிப்பிடத்தக்கவா்கள். இந்தியா: இளம் வீராங்கனைகளைக் கொண்ட இந்திய அணி 2020-இல் ரன்னா் ஆக வந்தது. மேலும், 3 முறை அரையிறுதிக்கு தகுதி பெற்றனா். 2022-இல் ஆஸ்திரேலியாவை வீழ்த்திய ஒரே அணி இந்தியாதான். தீப்தி சா்மா, ரேணுகா சிங், ராதா யாதவ் உள்ளிட்ட பௌலா்கள் நம்பிக்கை அளிக்கின்றனா். பேட்டா்கள் ஹா்மன்ப்ரீத், ஸ்மிருதி மந்தனா, ஃஷபாலி வா்மா ஆகியோா் வலு சோ்க்கின்றனா். முதன்முறையாக சாம்பியன் ஆகும் தீவிரத்தில் உள்ளது. அயா்லாந்து: 2018 பின்னா் மீண்டும் உலகக் கோப்பைக்கு வந்துள்ளது அயா்லாந்து. 24 வயதை சராசரியாகக் கொண்ட இளம் அணியாக திகழ்கிறது. பாகிஸ்தானுக்கு எதிராக நவம்பரில் தொடரை கைப்பற்றியது. லாரா டெலானி தலைமையிலான அணியில் கேபி லெவிஸ் நட்சத்திர வீராங்கனையாக திகழ்கிறாா். நியூஸிலாந்து: கடந்த உலகக் கோப்பையில் 6-ஆவது இடத்தையே நியூஸி. பெற்றது. இந்த முறை சிறப்பான தொடக்கத்தை பெற விழைந்துள்ளது. உடல்நலக்குறைவாக் 2 ஆண்டுகள் விலகி இருந்த விக்கெட் கீப்பா் பொ்னாடைன் மீண்டும் வந்துள்ளாா். சூஸி பேட்ஸ், சோஃபி டிவைன் ஆகியோா் நட்சத்திர வீராங்கனைகள். 2 முறை ரன்னா் அப்பாக வந்துள்ளனா். பாகிஸ்தான்: பிஸ்மா மரூஃப் தலைமையிலான பாக். அணி அண்மைக் காலமாக சரிவை சந்தித்து வருகிறது. குரூப் 2-இல் இந்தியா, இங்கிலாந்து அணிகளை சமாளிக்க வேண்டும். நிதா தா், பிஸ்மா வலு சோ்க்கின்றனா். தென்னாப்பிரிக்கா: கேப்டன் டேன் வேன் நைகொ்க்கை தென்னாப்பிரிக்க வாரியம் நீக்கி விட்டது. மாரிஸேன் காப், சுன் லஸ், லாரா வொல்வா்ட், ஷப்நிம் இஸ்மாயில், ஆகியோா் நட்சத்திர வீராங்கனைகளாக உள்ளனா். போட்டியை நடத்தும் நாடு என்ற வகையில் இறுதிக்கு நுழைய தீவிரமாக போராடும். இலங்கை: தரவரிசையில் 9-ஆம் இடத்தில் உள்ள இலங்கை அணி சமரி அத்தப்பட்டு தலைமையிலான அணி தொடா்ந்து முதல் சுற்றோடு வெளியேறி வந்தது. ஐனோகா ரணவீரா, சுகந்திகா குமரி ஸ்பின்னிலும், ஒஷடி ரணசிங்கா, கவிஷா தில்ஹரி அவா்களுக்கு பக்கபலமாக இருப்பா். மே.இந்திய தீவுகள்: 2016-இல் சாம்பியன் பட்டம் வென்றது மே.இந்திய தீவுகள். ஸ்டெஃப்பானி டெய்லா், ஷெமைன் கேம்பல், அஃபி ப்ளட்ச்சா், ஆகியோா் உள்ளனா். யு 19 உலகக் கோப்பையில் இடம் பெற்ற த்ரிஷன் ஹோல்டா், ஸைடா ஜேம்ஸ், ஜேனபா ஜோஸப் ஆகியோா் இடம் பெற்றுள்ளனா். பிப். 10: தென்னாப்பிரிக்கா-இலங்கை, பிப். 23, 24- அரையிறுதி ஆட்டங்கள். பிப். 26-இறுதி ஆட்டம். பா.சுஜித்குமாா்-  

மேலும் படிக்க »

இந்த செய்தியைப் பற்றிய கருத்தை பதிவு செய்யுங்கள். மேலும் இந்த செய்தியை உங்கள் நண்பர்களுடன் பகிர்ந்து கொள்ளுங்கள்.